Nagbaliskad ang isa ka salakyan sa Circumferential Road malapit sa isa ka Business Process Outsourcing Company sa Barangay Villamonte, Bacolod City alas-3:40 kaina sang kaagahon, samtang na-iguan man ang isa pa ka salakyan.
Sa interview sang Bombo Radyo Bacolod kay Joey Rey Oria, 27 anyos, driver sang nagbaliskad nga Mitsubishi Mirage, siya ang gikan sa Barangay Sum-ag kag papauli kuntani sa Prk. Magbinuligay, Brgy Bata.
Suno diri, mapondo na siya kuntani sa natuo nga bahin apang nakibot nalang siya nga nagbaliskad ang salakyan.
Ginalantaw sini nga mahimo may damage sa likod nga royda sang iya salakyan.
Suno kay Oria, wala man ini naka-agom sang pilas bangod siya ang nakaseat belt apang nagpalanakit ang iya kalawasan.
Naiguan naman sini ang likod nga bahin sang nakapark nga Suzuki Ertiga nga ginamaneho ni Alyas Bernabe.
Samtang sa interview sang Bombo Radyo Bacolod kay Police Major Elmer Bonilla, head sang Traffic Management Unit sang Bacolod City Police Office, ginapahayag nga napiyongan si Oria, kag bangod sa sala nga pagliso gani nagbaliskad ang salakyan.
Gindala naman nila ang salakyan sa compound sang Bacolod Transportation and Traffic Management Department (BTTMD) nga marelease man kun mabayaran na sini ang damage sa isa ka salakyan ukon depende sa ila settlement.
Panawagan ni Bonilla sa mga motorista nga kun natuyo, mas maayo nga magdulong na lamang kag magtulog.
Pahanumdom sini nga indi na hulaton nga may matabo nga aksidente nga mahimo makakuha sang kabuhi ukon pagkaguba sang mga propedad.
