Patay ang tricycle driver, samtang kritikal naman ang iya asawa, matapos mabungguan sang salakyan nga ginamaneho sang Coast Guard personnel sa Araneta Street, Brgy Sum-Ag, Bacolod City alas-12:45 sang kaagahon sang Oktubre 8.
Sa interview sang Bombo Radyo Bacolod kay Police Major Elmer Bonilla, head sang Traffic Enforcement Unit sang Bacolod City Police Office, tatlo ka salakyan ang involved sa aksidente nga ginalakipan sang Pick up Strada, tricycle, kag traditional jeepney nga sundanay nga nagabyahe sa south to north direction.
Ang Coast Guard personnel nga na-assign sa Coast Guard Substation Pulupandan, ang gikan pa sa duty.
Pahayag sang mga nakakita nga madasig ang dalagan sang salakyan, gani nabunggu-an sini ang buli nga bahin sang tricycle.
Ang trycicle ang nasandwich bangod ini ang nagbunggo man sa buli sang jeep bangod sa impact.
Ginbawian sang kabuhi ang driver sang tricycle, samtang kritikal naman sa karun ang kondisyon sang asawa.
Sila ang magasugat lamang kuntani sang ila nga bata nga gikan sa trabaho.
Pahayag sang Coast Guard personnel nga wala sini makita ang tricycle ilabi na nga maulanon ang tiyempo kag medyo dim ang street light.
Apang pahayag sang imbestigador nga yara man sa impluwensya sang makahulubog nga ilimnon ang coast guard personnel.
Ini ang nag-angkon lamang sang minor injuries, samtang wala naman sang napilasan sa sakay sang jeep.
