Nakita na ang salakyan nga gingamit sang mga nang-holdup sa tatlo ka mga construction worker sa ginatukod nga gasolinahan sa Brgy. Sum-ag sa ciudad sang Bacolod kahapon sang kaagahon, Marso 14.
Sa interview sang Bombo Radyo Bacolod kay Police Capt. Michael Tuburan, station commander sang Bacolod Police Station 9, narekober ang salakyan nga Toyota Innova nga nagaduag sang itom sa Medayna St. Brgy. Bata matapos gin-abandona ini sang mga suspetsado.
Suno kay Tuburan bangud natandaan sang mga biktima ang plate number sang Innova nga nakabulig sa kapulisan kag Land Transportation Office (LTO) agud madasig nga matumod ang tag-iya sang salakyan.
Suno diri, nagbulig man ang tag-iya sang salakyan nga residente sang ciudad sang Bago kag maayo lamang may tracking device natrace kun sa diin ang salakyan.
Gintiniran pa sang mga kapulisan ang salakyan sang kapin isa ka oras apang wala gid sang may nagpalapit nga tawo sa salakyan.
Ginpahayag sang station commander nga ang salakyan ang ginaparentahan kag ang renter ang isa ka babayi nga nag-alegar nga ginagamit sang utod sini.
Masami man ang renter nagarenta sang salakyan sa tag-iya kag nangin suki niya na ini.
Padayon man ang imbestigasyon sang mga kapulisan kun ang renter ang may kaangtanan sa suspek sang gina-alegar nga pagpanghold-up.
Madumduman nga kahapon sang kaagahon, gin-holdup sang armado nga mga lalaki ang tatlo ka mga construction worker sang gasolinahan sa Barangay Sum-AG ciudad sang Bacolod.
