Ginabanta triple ang kadamuon sang mga motorista nga nagasulod sa ciudad sang Bacolod subong nga Christmas season.
Sa interview sang Bombo Radyo Bacolod kay Bacolod Traffic Authority Office (BTAO) Head Patrick Leonard Lacson, ang pagsulod sang madamo nga mga motorista ang maayo para sa ekonomiya sang ciudad bilang “center of trade” partikular na sa mga malls, shopping area, kalan-an, hotels kag iban pa.
Sa random survey nga ila ginapatigayon sa mga byahero, kalabanan sa mga ini ang nagikan sa nagkalainlain nga ciudad kag banwa sa Negros Occidental, kasubong man mga gikan sa Negros Oriental kag Iloilo.
Apang kadungan sini ang problema sa pagbug-at sang trapiko.
Suno kay Lacson, nakita nila nga masami nagaluntad ang road congestions halin alas-4:00 sang hapon tubtob alas-7:00 sang gab-i.
Paathag sini nga alas-4:30 sang hapon, ginapapatay na lamang sini ang mga traffic lights kag ginabutangan sang traffic enforcers ang mga exit points agud magserbe nga traffic break kag magabutong sang dalagan sang mga salakyan.
Aminado si Lacson nga alarming na ang kabug-atun sang trapiko gani ang operation “Exit Bacolod” amo ang nakita nila nga paagi agud makapiyan-piyan.
Apang isa sa ginaduso sini nga mahimuan sang paagi amo ang pagbutang sang dugang nga traffic signages.
Paathag sang BTAO Head na sa karun ang masami nagagutok ang trapiko amo ang mga exit points sa North Bound kasubong man sa East.
Indi naman tuman ang traffic sa South exit bangod nakita sini nga madamo sang mga options nga alagyan nga mahimo mapilian sang mga motorista.
Suno diri, kun may-ara kuntani sang mga traffic signages sa iban nga mga bottle neck areas, nga magaserbe nga giya sang mga ini sa alternative routes agud maghawan ang mga mayor nga dalan.
Indi naman tuman ang traffic karun sa aga, nga ginalantaw sini bangod sa bakasyon na sang mga estudyante samtang wala man sang problema sa trapiko sa kaagahon sa tion sang Simbang Gabi.
