Narekober na sang mga pulis ang salakyan sang konsehal sang ciudad sang Bago nga gincarnap sang mga suspetsado nga pilit nga nagpasulod sa iya sa motel sang Miyerkules sang hapon kun sa diin ini ginhold-up.
Sa interview sang Bombo Radyo Bacolod kay Police Capt. Paul Vincent Pendon, station commander sang Bacolod City Police Station 2, gin-athag sini nga wala sang abduction nga natabo kundi masulod sa robbery ang natabo kay Bago City Councilor Cleo Gaudite.
Suno kay Pendon, kahapon lang sang aga nagpadulong sa Police Station 2 si Gaudite sa agud nga magpablotter sa natabo sa iya sadtong May 26 sang hapon.
Suno sa panaysaysayon sang konsehal, yara ini malapit sa Starbucks sa 18th St. Lacson kag nagapasaka sa iya salakyan nga Mitsubishi Mirage sang nagsaka man ang duha ka mga suspetsado.
Samtang nagadrive ang biktima, gintutukan ini sang isa ka suspetsado sang ice pick kag ginsugo ini nga magsulod sa Imperial Court sa dalan Gatuslao bangud ila ini nga nalabayan kag didto ginpadayon ang hold-up incident.
Ginpaubahan man sang delargo sang mga suspetsado ang biktima kag ginkuha ang P3000 cash kasubong man ang wallet kag cellphone antes nagbiya sa lugar sakay sa salakyan sang opisyal.
Nakatilaw man sang sakit ang biktima bangud mahimo nga nag-ayo ini sa mga suspetsado nga indi pagkuhaon ang mga gamit sini.
Ara man sa sulod sang salakyan sang biktima ang wallet kag valid IDs kaangay sang driver’s license.
Nagpangayo naman ang biktima sang bulig sa staff sang motel agud nga makahalin sa lugar matapos nga ginbilin siya sang mga suspetsado sang ini ang nagpalagyo.
May nabatian naman nga ngalan ang biktima nga ngalan sang isa ka suspetsado nga si Alyas Jun bangud nagaistoryahanay ang duha ka mga suspetsado sa sulod sang salakyan.
Wala ini sang sketch apang makilala sini ang nawong sang mga suspetsado sa tion nga makita niya ini.
Santo sa panaysaysayon sang biktima, ang isa sa suspetsado ang nagasuksok sang ball cap, facemask, black Tshirt kag shorts samtang ang isa ang ginabanta nga 5’6 ang height, nagasuksok sang kalo, pantalon, tshirt kag face mask.
Ginapadulungan naman sang imbestigador sang PS2 ang mga establishmento nga ginmitlang sang biktima agud nga makakuha sang kopya sang CCTV para sa imbestigasyon kag makakuha sang identity kag whereabouts sang mga suspect.
Kahapon sang hapon, narecover ang salakyan sang biktima sa Circumferential road, Brgy. Villamonte, syudad sang Bacolod nga nakalock apang nabuksan naman paagi sa duplicate nga yabi sang salakyan.
Yara naman sa kustodiya sang Bacolod City Police Station 2 ang salakyan sang konsehal.
Padayon pa sa karun ang imbestigasyon sang Police Station 2 agud matumod ang motibo sang paghold-up sa biktima kasubong man makilala ang mga suspetsado.
