Ginkumpirmar sang kaingod balay sang napatay nga senior citizen sa sunog sa Prk Maanyag 2, Brgy Alijis, Bacolod City nga nakakandado ang balay sang biktima gani ini ang wala nakagwa.
Ginpakita mismo ni Alyas Jimmy ang dako nga padlock sa kadena nga naga-angot pa gihapon sa piyertahan.
Suno diri, mahimo nga bangod sa madasig nga paglatay sang kalayo, wala na makuha sang mag-asawa nga senior citizen ang yabi tubtob nga malab-ot na sang kalayo, gani indi nila mabuksan ang kandado.
Bangod sini, nagtaklas na lamang ang bana nga si Jose Magbanua, 62 anyos sa pader nga duha ka metro ang kataason.
Gintinguhaan pa sini nga butungon pasaka ang iya asawa nga si Rosa Magbanua, 79 anyos, apang mahimo nga indi na sini masarangan.
Tubtob nga nagbuya si Rosa, kag ginhambalan na lamang ang iya bana nga “salbara nalang ang kaugalingon mo.”
Gilayon nga nagdalagan ang bana agud magpangita sang makabulig apang dako na katama ang kalayo sa iya nga pagbalik.
Nadugayan man sila nga makita ang lawas ni Rosa nga gintupok gid sang kalayo.
May-ara man sang residente nga ginapahayag nakakita kay Rosa nga nagatinguha nga makagwa, kag ini ang iya ginbuligan paagi sa pagbasya sang tubig sa biktima.
Apang sang magsag-ob ini sang dugang nga tubig, nagcollapse na ang pader kag natampukan ang biktima.
