Padayon pa ang imbestigasyon sang San Carlos City Fire Station sa ginhalinan sang sunog nga nagluntad sa purok Ipil-ipil, brgy 1, ciudad sang San Carlos, Negros Occidental, sang Sabado, kapin alas- 2:50 sang hapon.
Sa interview sang Bombo Radyo kay Fire Officer 2 Neil Bantillo, Chief fire investigator sang San Carlos City Fire Station, nagabalik-balik pa sila sa area agud mag-imbestigar apang mabudlay para sa ila bangod halos human sa light materials ang mga balay.
Suno diri, nagdangat sa kapin sa 30 ka pamilya ukon 108 ka mga individual ang temporaryo nagatinir sa covered court sang barangay.
Padayon naman sa karun ang pag-abot sang relief goods kag cash assistance para sa mga apektado sang sunog.
Madumduman nga may apat ka tuig nga bata nga babayi nga napatay matapos matrap sa sulod sang nagakasunog nga balay.
Suno kay Bantillo, ginbilin sang iloy ang bata sa lola bangod nangompanyar ini samtang ang bana naman sini ang naglakat para magtrabaho.
Kalabanan man sa mga tawo sa lugar ang naglakat kompanyar.
Suno pa diri, sang nagluntad ang sunog, gintinguhaan sang lola nga hakwaton ang tatlo sini ka apo agud salbaron apang nadagdag ang apat ka tuig nga bata kag bangod nagsala ini sa sitwasyon nagdalagan ini pabalik sa balay.// Gintinguhaan sang lola nga balikan ang bata apang wala na sini nasalbar pa bangod nagdako na ang kalayo.
