Plano sang alkalde sa ciudad sang San Carlos nga maggamit sang QR Code para sa mga infrastructure projects agud mahapos matumod kun ano ang matuod kag indi.
Ini kasunod sang paghimo sang peke nga mga dokumento sang tatlo ka Northern Luzon-based Construction Firm nga nagapahayag nga sila ang may natukod nga flood control projects sa San Carlos City, bilang credentials sa ila nga pagpa-upgrade sang lisensya.
Sa interview sang Bombo Radyo Bacolod kay Joe Ricalex Alingasa Jr., tagpamaba ni Mayor Renato Gustilo, sa meeting kahapon, gindeny sang alkalde ang tatlo ka dokumento bangod sa gina-alegar forged nga pirma.
Ini ang ginalakipan sang Kontrata, Notice of Award kag Notice to Proceed, kag palarehas man ang pagkapirma sa mga dokumento sang tatlo ka contractor.
Ang mga gina-alegar unscrupulous contractors ang ginalakipan sang EKC Construction and Aggregate nga nakabase sa Benguet nga nagapahayag may flood control project sa Andoon river sa balor nga P77.5 million; Jaben General Contracting Engrineering Services sang Baguio City nga nagpahayag may proyekto sa Jigalaman river sa balor nga P77.3 million; kag APO General Construction sang Mountain Province nga nagpahayag may proyekto sa Palampas river sa balor nga P151.5 million.
Ginakwestyon sang alkalde kun ngaa sa San Carlos City gid ang napili nila nga lugar nga gamiton kag iya pangalan kag pirma ang ginpeke apisar nga sila ang nakabase sa Northern Luzon.
Gin-athag man ni Alingasa nga wala gid sang problema sa mga existing flood control projects sang Department of Public Works and Highways – Negros Island Region kag DPWH – San Carlos.
Sa karun, ginahulat nalang nila ang resulta sang imbestigasyon sang National Bureau of Investigation Central Office batok sa tatlo ka unscrupulous contractors.
Pahayag ni Mayor Gustilo nga imbes nga sa falsification of public documents kag forgery magtutok, sila ang mas magafocus sa karun sa pagpangita sang solusyon sa problema sa baha sa Poblacion ukon sentro sang ciudad.
