May gintalana nga tatlo ka area sa San Carlos City, Negros Occidental nga himuon nga temporary shelter para sa mga maapektuhan sang paglupok sang Bulkan Kanlaon gikan sa Canlaon City, Negros Oriental.
Sa interview sang Bombo Radyo Bacolod kay San Carlos City Mayor Renato Gustilo, inkaso magsaka sa alert level 4 ang status sang bulkan, magalapad sa 10km radius ang evacuation efforts.
Mahimo nga malab-ot diri ang Barangay Codcod, sang ciudad, apang ang kaingod nga Canlaon City ang mahimo nga masalama.
Bangod sini, ginpreparar nila ang tatlo ka lugar nga ginalakipan sang Lagha Quezon Elementary School, duha ka ektarya nga duta sa Barangay Prosperidad kag tatlo ka ektarya nga duta sa Barangay Rizal, sa San Carlos City proper.
Apang amindo ang alkalde nga ang problema amo ang financial constraint, gani siya ang nakig-angot na kay Negros Occidental Governor Eugenio Jose “Bong” Lacson agud sila ang mabuligan.
Sa karun wala pa sang commitment ang gobernador, apang ini ang ginpaidalom na sa assessment.
Sa karun, nagapadayun ang ila development sa nasambitan nga mga lugar agud temprano nga makapreparar sa worst case scenario.
Isa sa mga importante nga kinahanglan nga mahitso sa temporary shelter ang tubig kag CR.
Dugang pa sini nga indi man makasustiner ang budget sang ciudad sa pagpakaon kun magalawig ang pagtinir sa temporary shelter.
Sa pihak nga bahin, panugyan naman sini sa mga taga San Carlos nga may himata sa Canlaon nga i-akumodar sa ila panimalay inkaso matabo ang major eruption.
Ukon bisan wala sang himata, mahimo man mag-adoptar sang pamilya sang evacuees.
