Nagdangat na sa tatlo ang local government unit sa probinsya sang Negros Occidental nga ginpaidalom sa state of calamity bangud sa epekto sang El Niño.
Una nga nagdeklarar ang banwa sang Pontevedra kag ciudad sang Kabankalan.
Sang Lunes, gin-aprubahan ang rekomendasyon sang City Disaster Risk Reduction and Management Council sang San Carlos City nga ipaidalom ang ciudad sa state of calamity.
Ang resolusyon angot diri ang gin-endorso naman sa Sangguniang Panlungsod sang ciudad kag gilayon man gin-adoptar.
Nagdangat na sa kapin P18 milion ang kahalitan sa pananom ang gintuga sang El Niño sa ciudad.
Suno kay Joe Recalex Alingasa Jr., San Carlos City Disaster Risk Reduction Management Office Head, indi lang pananom ang nahalitan kundi may mga livestocks man ang nagkalamatay bangud sa tuman kainit.
Magluwas sini, nagaamat-amat naman diutay ang tubig sa bubon kasubong man sa mga suba.
Suno kay Alingasa, ginahulat nalang nga mapirmahan sang Sangguniang Panlungsod ang resolusyon nga nagadeklarar sang state of calamity agud nga magamit na sang ciudad ang portion sang calamity fund sa pagbulig sa mga apektado, ilabi na sa mga mangunguma.
