Ginpanginwala ni Sandara Park ang alegasyon ni Park Bom nga nagagamit ini sang illegal nga druga.
Suno kay Sandara, wala ini maka-agi usar sang illegal nga druga.
Madumduman nga nagpahayag si Bom nga gingamit lamang siya agud matabonan ang drug issues kun sa diin involved si Sandara.
May naggwa nga report nga nahambal lamang ni Bom ang mga alegasyon bangod sa iya unstable nga kondisyon.
Nagbaton si Bom sang mga kritisismo bangod sa unverified nga mga claims sini angot sa iban nga mga celebrities.
Sa isa ka handwritten note, ginhambalan ni Bom si Yang Hyun Suk, ang founder sang YG Entertainment; si Teddy Park, ang founder sang Black Label; kag si CL nga miyembro sang 2NE1, nga untaton na ang pagreport nga nag-usar siya sang masobra sa prescribed amount sang bulong.
Mahibaloan nga sadto involved si Bom sa kontorbersiya sa prescription sang Adderall nga ginagamit para sa treatment sa Attention Deficit Hyperactivity Disorder (ADHD).
Sang 2010, gin-imbestigaran si Bom sa pag-import sini sang bulong halin sa Estados Unidos pasulod sa South Korea apang nagsumiter si Bom sang medical records kag prescriptions para mapamatud-an nga ang medication gingamit para sa treatment purposes kag siya nakabaton sang indictment suspension.
