Nagpasar sang resolusyon ang Bacolod City Council nga nagamando sa Bacolod City Water District (BACIWA) – Prime Water sa paghatag sang malimpyo kag tayuyon nga tubig para sa mga Bacolodnon.
Sa interview kay Bacolod City Councilor Bobby Rojas, chairperson sa Committee on Energy and Public Utilities, bisan sa State of the Nation Address ni President Ferdinand “Bongbong” Marcos, namensyonar ang tuhoy sa Joint Venture Agreements.
Ginpaanggid pa sang konsehal ang performance sang BACIWA-Prime Water sa performance sang Negros Electric and Power Corporation (Negros Power) nga nakitaan sang dako nga improvement sa isa pa lamang ka tuig nga pagserbisyo.
Suno kay Rojas, ang problema sadto sang BACIWA-Primewater amo ang wala sang nagakaigo nga makuhaan sang water supply, apang sa karun ini ang indi na problema.
Ini bangod may natalana nga magsulod nga dako nga supplier, nga nagpasalig makahatag sang 50 porsyento sang requirement gikan sa Sum-ag river.
Suno kay Rojas, ang Sangguniang Panlungsod ang magamonitor sa nasambitan nga proyekto kag magapahanumdom sa ila commitment sa mga pumuluyo.
Panawagan sini sa BACIWA-Primewater nga himuon ang trabaho sa pagmintinar sang water sources agud makahatag sang dekalidad, bastante kag matinlo nga tubig sa mga Bacolodnon.
Samtang, magapatawag sang conference si Bacolod City Mayor Greg Gasataya sa Bacolod City Water District (BACIWA) – Prime Water sa masunod nga semana.
Suno diri, pasulit-sulit na lamang ang problema sa supply sang tubig sa ciudad.
Ini kasunod sang mga reklamo sa lubog nga tubig, maninit nga tubig, ukon may oras lamang nga pagtubod sang tubig sa mga gripo, nga masami kaagahon, nga nagaresulta sa pagpulaw sang mga pumuluyo agud makasalod.
Suno diri, luyag niya mahibaluan ang plan of action sang BACIWA-Primewater sa paghatag solusyon sa problema.
Aminado naman ang alkalde nga maayo-ayo pa ang sitwasyon sang ciudad kun ipaanggid sa iban pa nga mga lugar nga may Joint Venture Agreement ang Primewater sa mga water districts.
