Gin-athag sang bise alkalde sang ciudad sang Bacolod nga wala sang mahimo ang Sangguniang Panlungsod sa mangin desisyon sang national government para sa pagphase out sang mga traditional jeepney.
Sa interview sang Bombo Radyo kay Bacolod City Vice Mayor El Cid Familiaran, nagpangayo sang bulig ang mga drayber kag operators sang traditional jeepney sa ciudad nga sila ang mahatagan sang extension sa ila pagbyahe.
Suno diri, ang iban nga transport sector kaangay sang Pagkakaisa ng mga Samahan ng Tsuper at Opereytor Nationwide (Piston) ang nagfile sang petition sa supreme court para sa Temporary restraining orders (TRO) sa pagpa-untat sang implementasyon sang jeepney modernization program.
Apang, suno kay Familiran, hulaton na gid lamang ang desisyon sang national government, kun sa diin nakapagwa naman sang memorandum order ang Department of Transportation (DOTr) nga wala na sang extension para sa mga traditional jeepney nga wala nakapaconsolidate ukon nagsulod sa kooperatiba ukon korporasyon.
Dugang pa sini, kun matigayon ang phase out, kun sin-o man nga traditional jeepney ang magabyahe sa Enero 1, 2024, ini ang pagakabigon nga illegal kag pagadakpon.
Paathag ni Familiaran, ang modernization program isa ka manami nga programa sang gobyerno para sa reliable, convenient, efficient kag mas safe para sa mga pasahero, apang ang kwestyonable lang diri amo ang mahal nga presyo sang pagbakal sang modernized jeep.
