Magahuman sang resolusyon ang Sangguniang Panlungsod sa syudad sang Bacolod agud mahatagan sang penalidad ang mga junk shop nga nagabakal sang kinawatan nga kable sang kuryente.
Suno kay Bacolod City Administrator Atty. Pacifico Maghari III, sila ang nakabatun sang update gikan kay Bacolod City Police Office (BCPO) director P/Col. Noel Aliño natuhoy sa nadakpan nga kawatan ala-1:00 sang kaagahon kahapon.
Madumduman nga nadakpan mismo sa akto nga nagapangawat sang kable sang kuryente sa Barangay Singcang-Airport si Neil Celestre, 38 anyos kag Residente sa Barangay Mansilingan, Bacolod City.
Narecover diri ang anom ka metros sang cable wire nga nagabalor P13,000.
Ang suspetsado ang nakahunong na sa karun sa Bacolod Police Station 7, kag natalana nga pasakaan sang kaso nga theft.
Suno kay Maghari, nagapadayun ang effort sang syudad nga matapna ang kinawatay kasubong man ang may kaangtanan diri kaangay sang mga junkshop.
Ginahingyo nila sa mga junkshop nga maghatag sang impormasyon kun may nagabaligya sang kinawatan nga kable samtang dapat man nga likawan sang mga ini ang pagbakal bangod nakahibalo naman ang mga ini nga lapnagon ang kinawatay sa syudad.
Paathag sang City Administrator nga wala sang magapangawat kun wala sang nagapamakal.
Magahuman man sila sang resolusyon nga magakondenar sa pagbakal sang kinawatan nga mga kable kag magapangita sang ordinansa agud mapatuman sa syudad ang paghatag sang penalidad.
Paathag ni Maghari nga may gahom ang syudad sa pagpatigayon sang inspection sa mga junkshop kaangay sa tion sang pag-issue sang business permit kag inventory samtang ang mga kapulisan ang magapatigayon naman sang pagpatrolya.
Pahanumdom sang abogado nga santo sa National Law, ang mga nagabakal sang kinawatan ang guilty naman sa Anti-Fencing Law.
Suno diri, sa tion nga may itudlo na ang mga kawatan nga madakpan nga mga jukshop nga nagabakal sang ila kinawatan, ini ang pagahimuan naman sang tikang sang Bacolod City government.
