Magacompete ang Sangguniang Panlungsod sang Bacolod sa national level sang Local Legislative Award matapos nga magdaog sa regional level para sa highly urbanized city nga category.
Suno kay Vice Mayor El Cid Familiaran, ang Local Legislative Award ang isa ka programa sang national government paagi sa Department of the Interior and Local Government kada tuig kag gindihon agud nga irecognize ang exemplary contribution sang legislative bodies kag ginakilala ang mga resolutions kag ordinances nga may impact sa pangabuhi sang mga constituents.
Bangud wala sang Local Legislative Award sang 2020 tubtub 2022 bangud sa COVID pandemic, subong nga tuig ini ginbalik kag ginlantaw sang DILG panel ang tatlo ka tuig nga legislations.
Sang 2019, ang Bacolod man ang tiglawas sang Region 6 apang nagdaog ang Quezon City sa national level.
Ginpanginbulahan ni Familiaran ang mga miyembro sang Konseho bangud collective effort ini sang Sangguniang Panlungsod.
Sa pagpasakop, nagapasa sang mga documents angot sa legislation sang Konseho.
Isa sa ginalantaw ni Familiaran nga rason sang pagdaog amo ang mga legislations ni former Councilor Archie Baribar sang COVID pandemic nga masuksok sang face mask, ladderized nga paghatag sang cash incentives sa mga senior citizens halin sa edad nga 80 anyos tubtub makalab-ot sa 100 anyos; kag mga environmental ordinances nga ginduso ni former Councilor Carl Lopez.
May mga tinion man nga nagsit in ang DILG personnel sa session agud nga lantawon ang partisipasyon sang mga konsehal, ang plastar sang session hall kag ila man nakita ang paperless session apang may live streaming.
Aminado si Familiaran nga challenging ang pagpasakop sa national level bangud dalagko ang budget sang mga ciudad nga kasumpong kaangay sang Makati City kag mahapos ang implementasyon sang legislation, samtang pagpanghangkat naman ini para sa ciudad sang Bacolod.
Bangud sini, ang tsansa diri sang Bacolod suno sa bise alkalde amo ang kalidad sang mga ordinances nga ginpasar sang Konseho.
Suno kay Familiaran, kadungganan na sang City Council nga mangin tiglawas sang Region 6 sa Local Legislative Award bisan indi man magdaog.
