Naghingyo ang Sangguniang Panlungsod sa city government sang Bacolod nga magbakal sang bulong para sa COVID.
Suno kay Bacolod City Councilor Renecito Novero, unanimous ang approval sang City Council sa resolusyon nga iya ginduso nga nagahingyo sa city government nga magbakal sang remdesivir.
Nahibaluan nga remdesivir kag tocilizumab ang kalabanan nga bulong nga ginagamit sang mga doktor agud itreat ang mga pasyente nga may malala nga sintomas sang COVID.
Suno kay Novero, mahal ang remdesivir kag maiwat ang supply gani indi ini masarangan sang pigado nga mga pasyente kag kun may ikasarang man nga magbakal, mabudlay man ang pagpangita sang mabaklan.
Sang tinalikdan nga tuig, P9,000 tubtub P10,000 ang vial sang remdesivir, nagsaka sa P35,000 kag subong, nagabili na ini sang P90,000 tubtub P100,000.
Bangud sini, nagpanawagan ang mga konsehal sa city government nga magpangita sang supplier nga mabaklan sang remdesivir bangud kun kaisa, nagaamot-amot pa ang mga organisasyon agud makabakal sang anti-viral drug para sa ila nga kakilala.
Suno kay Novero, mahimo nga may yara sang available nga budget nga sarang magamit sang ciudad sa procurement sang bulong gani mas maayo gid kun makabakal sini.
Ginatugyan naman sang mga konsehal sa City Health Office kag sa Office of the City Mayor ang policy kag pag-manage sang sarang nga maka-avail sang bulong, bangud ang bakuna ang ginahatag man nga libre sa mga pumuluyo.
