Personal nga ginpadulungan sang alkalde sang ciudad sang Bacolod ang Sanitary Landfill sa Barangay Felisa agud nga makita ang aktwal nga sitwasyon.
Sa interview sang Bombo Radyo Bacolod kay Bacolod City Mayor Greg Gasataya, nakita sini nga manugpuno na ang sanitary landfill santo man sa ila nga nadiskusyunan sang nagligad.
Suno kay Gasataya, dapat mahimuan na ini sang tikang agud nga indi na mangin problema sang Bacolod City.
Pahayag ni Gasataya, nga ang rason sang gulpi lang nga daw halos mapuno na ang landfill ang bangud may yara sang 300 ka trucks sang basura nga nagikan sa Barangay Sum-ag nga gintambak didto.
Suno sa alkalde kun mapuno na ang sanitary landfill wala na sang mahimo kundi magapangita sang bag-o ukon mangin cell no. 5 na nga halabuyan sang basura sa ciudad.
Suno diri, mahimo nga madugayan pa ang pag-operate sang ginaubra nga recycling plant bangud madamo pa sang mga rekesitos nga kinahanglan icomply.
Tinguhaan man sang ciudad nga macomply ang mga rekisitos agud nga mapatukod na ang recycling plant.
Samtang himuan man sang ciudad sang pamaagi nga mabuligan ang mga nagapangkuha sang marecycle nga basura gikan sa landfill agud nga mabaligya sa gamay nga kantidad.
