Nagapati ang convenor sang Save the Sugar Industry Movement nga may-ara sang nagaganar sa merkado kabaylo sang pag-antos sang magagmay nga sugar planters.
Madumduman nga una nga ginkwestyon ni Negros Occidental 5th District Congressman Atty Dino Yulo kun ngaa wala naga-apekto ang law of supply and demand sa sugar industry.
Ini bangod apisar sa dyutay nga supply, barato gihapon ang millgate price imbes nga ini ang dapat nagsaka na.
Sa interview sang Bombo Radyo Bacolod kay Wennie Sancho, may-ara sang opisyal sang gobyerno nga nagaserbe nga facilitators sa sugar trading import kag export business.
Ginalantaw sini nga ang billion pesos nga mga transaksyon ang nagtulod sa pagpadayun sang indi husto nga mga transaksyon.
Paathag ni Sancho nga ang sugar farmers amo ang naga-antos sa tuman ka barato nga millgate price.
Dugang pa nga diri man magakuha sang labor coasts kalakip na ang abono kag hilo nga pangpatay sang hilamon.
Dugang pa nga magastuhan man ang sugar planters sang wage increase kag 13th month pay sa ila nga mga tawo subong nga Disyembre.
Pahayag pa sini nga apisar sa manubo nga millgate price, mahal gihapon ang kalamay nga ginabaligya sa publiko.
Suno kay Sancho, kaangay nga wala sang gahom ang Sugar Regulatory Administration sa pagregulate sang stocks nga nagasulod kag nagagwa sa pungsod.
Pangabay sini nga sa idalom sang Republic Act 12022 ukon Anti Agricultural Smuggling and Economic Sabotage Act, dapat mafilan na sang kaso ang mga opisyal sang gobyerno nga nagafaciliate.
Paathag ni Sancho nga nalakip sa provision sang RA 12022 ang price manipulation kag market distortion nga nagakatabo sa karun sa sugar industry.
Pahanumdom sini nga 50 porsyento sang kalamay sa bilog nga Pilipinas ang ginaproduce sang Negros Occidental gani ini ang dako nga halit sa probinsya.
Kun magapadayun pa ang price manipulation kag market distortion, ginalantaw ni Sancho ang posibilidad nga macollapse ang industriya sang kalamay.
