Opisyal na nga ginhingadlan ang P-pop supergroup nga SB19 bilang bag-o nga tourism ambassador sang Pilipinas.
Ini ang gin-anunsyo sang Department of Tourism (DOT) sang Hulyo 26, kun sa diin ginpadal-an pa ang grupo sang isa ka “galingbayan” box bilang send-off gift samtang yara sila sa Estados Unidos para sa ila mga aktibidad.
Suno kay Tourism Secretary Dita Angara-Mathay, indi lamang musika ang napakita sang SB19 kundi pati man ang ila masangkad nga impluwensya sa mga tagasuporta sa Estados Unidos, Europa, ASEAN, kag iban pa nga bahin sang kalibutan.
Ginpahayag man niya nga nagadamo ang mga Filipino-American nga nagapauli sa Pilipinas agud makita sa personal ang SB19, kasubong man sa mga naggikan sa kaingod pungsod sa ASEAN ang na-engganyo man nga magbisita sa Pilipinas.
Bilang ila bag-o nga katungdanan, ginalauman nga mas damo pa gid nga mga international fans ang ma-agda sang grupo nga magbisita sa pungsod kag maekperyensyahan ang kultura kag turismo sini.
Ang SB19 ang natalana nga mag-perform sa international music festival nga Lollapalooza kag Summer Sonic sa Hulyo 30 tubtob Agosto 2.
