Gin-adjust sang schedule sang klase sang mga Senior High School sa bilog nga Department of Education division of Bacolod City.
Ini matapos sang post sa social media sang isa ka iloy nga nagakwestyon sa alas-5:30 sang hapon nga buhi sang senior high school kag gina-alegar sini nga 10 ka oras nga pagtinir sa eskwelahan, nga mas malawig sangsa 8 working hours.
Sa interview sang Bombo Radyo Bacolod kay RJ Paglumutan, deputy spokesperson sang DepEd Bacolod, ginkonsiderar ni DepEd Bacolod Superintendent Dr. Dennis Develos kag Bacolod City National High School Principal Richard Gelangre ang concern gani gin-adjust nila ang bilog nga class schedules.
Apang pahanumdom ni Paglumutan nga ang alas-07:30 sang aga tubtob alas-5:30 sang hapon nga class schedule amo ang nakaandan na nga schedule humalin sang nakaligad nga mga tinuig.
Pahanumdom pa sini nga indi kaangay sa Junior High School nga tayuyon ang klase, ang class scheduling sang Senior High School ang nakabasi sa kolehiyo.
Gani indi bilog nga adlaw ang klase ilabi na nga may mga tion nga may mga bakante nga schedules sa tunga, ukon may adlaw nga wala sang klase kag indi man adlaw-adlaw nga alas-5:30 ang buhi.
Apang ginakonsiderar man nila ang concern nga may mga estudyante sa Bacolod City Senior High School nga gikan pa sa malayo nga lugar kaangay sa Don Salvador Benedicto, Murcia kag iban pa gani nagakahangawa ang ginikanan kun late na ang buhi.
Bangod sini, gin-adjust ang schedule sang tanan nga senior high school sa DepEd Bacolod kag sila ang ginrequire nga magbuhi alas-4:30 sang hapon.
Kabaylo sini, mahimo nga mangin mas tayuyon ang klase.
Suno kay Paglumutan, nakanugunan man ini bangod madamo na sang nalipay sa daan nga schedule partikular na ang mga nagatrabaho samtang naga-eskwela bangod sila ang may bakante kuntani nga schedule agud makatrabaho.
Apang sila ang wala sang mahimo kundi ang magsunod sa adjustment.
Panawagan na lamang sini sa mga school heads nga kun maghimo sang class schedules, dapat ikonsiderar man ang welfare sang mga estudyante kag manunudlo.
