Ginpagwa na kahapon sang Yuhum Foundation ang opisyal nga schedule sang activities, events kag merchandise para sa nagahilapit nga Masskara Festival.
Sa interview sang Bombo Radyo kay Councilor Jason Villarosa, chairman sang committee on tourism sang Bacolod City, sa Oktubre 6 igaselebrar ang pagsugata sa Masskara Festival apang sa Oktubre 7 ini opisyal nga buksan kag ini naman magatakop sa Oktubre 22.
Suno diri, gindesisyonan nga panubuon na lang ang mga patigayunon nga events, gikan sa masobra ka 40 ka events sang nakaligad nga Masskara Festival.
Ini matapos maobserbaran nga may mga events nga indi man makabig nga productive events amo nga mas ginpakamaayo na lang nga pilion ang mga aktibidades nga nangin masanyog.
Patigayunon ang mga events sa anum ka sites nga ginalakipan sang Lacson street, Upper East Megaworld, Bacolod City Government Center, Bacolod Public Plaza, kag old Airport.
Kasubong man nga ginpanubo sa napulo na lamang ka barangay ang makapasakop sa Electric Masskara kag Masskara Street Dance and Arena Competition kag ini ginalakipan sang Barangay 21, 34, 40, Granada, Sum-ag, Tangub, Vista Alegre, Mansilingan, Cabug, kag Handumanan.
Pahayag ni Villarosa, ini agud indi na magdugay pa ang event kag qaulity performance ang mapakita sa mga tumalan-aw.
Samtang, ginkalipay sini nga madamo na sang nagbukas nga mga hotels kag inn apang ini naman naga-amat amat nga nagamahal nga ini man agud makabawi ang mga tag-iya sang hotels.
Nagapangabay si Villarosa nga mas maayo nga sa timprano pa nga tion magpa-reserve na sang rooms bangod sa Oktubre lauman nga fullybooked na ang mga hotels.
Nagpangagda man ini sa tanan nga magpreprar para sa mas dako kag mas masanag nga Masskara Festival.
