Wala nadayon ang natalana nga fire drill sang STI-West Negros University kaina sang aga matapos magluntad ang tuod-tuod nga sunog.
Pasado alas-8:30 sang aga sang masunog ang School of Basic Education sang unibersidad.
Sa interview sang Bombo Radyo sa utility worker nga si Ferdinand Cabungcag, nagluto ang mga estudyante sa ila nga Home Economics subject antes natabo ang sunog sa second floor sang building apang indi pa matumod kun diri naghalin ang kalayo.
Ang building ang ginagamit sang elementary department.
Gilayon naman nga ginpagwa ang mga estudyante sa apat ka panalgan nga building kag nabilin sang mga ini ang mga gamit sa sulod sang classrooms.
Makalipas ang malapit isa ka oras, gindeklarar nga fire out ang sunog.
Wala sang napilasan sa mga estudyante apang pila sa mga ini ang ginhatagan sang atensyon medikal matapos maglain ang pamatyag bangud nakahaklo sang aso.
Maayo nalang bangud nakahanda ang eskwelahan sa mga first aid kit kadungan sang natalana kuntani nga fire drill subong nga Biyernes.
Ginahibalo pa sang Bureau of Fire Protection kun pila ang balor sang halit nga ginbilin sang sunog.
