Ginkumpirmar sang Assistant Vice President for Business Planning and Operation sang Negros Electric and Power Corporation (Negros Power) nga may yara sang ginpatuman nga power interruption subong nga adlaw June 20, 2026 (Saturday).
Sa interview sang Bombo Radyo Bacolod kay Engineer Leomel Tambanillo, ang ginapatuman nga power interruption ang kabahin sang 5-year rehabilitation kag modernization plan sang Negros Power agud malikawan ang mga wala ginalauman kag mas lapnagon nga power interruptions kag mangin reliable ang distribution system sang elektrisidad.
Suno kay Tambanillo ang apektado sang power interruptions nga ginapatuman halin alas 6:00 ang takna sang aga tubtob alas 6:00 ang takna sang gab-i ang kabug-usan sang Lopez Feeder 1, kabug-usan nga Lopez Feeder 2, kabug-usan sang Lopez Feeder 3.
Samtang kaina alas 4:00 sang kaagahon tubtob alas 6:00 sang aga may nagluntad man nga power interruptions nga nakaapekto sa madamo nga lugar kag establishmento sa ciudad sang Bacolod kalakip na sa estasyon sang Bombo Radyo Bacolod.
Sa pihak nga bahin may yara naman sang patigayunon nga power interruptions bwas, Hunyo 21.
Ang power interruption ang bangud sa Reconductoring sang phase 1 tubtob 3 nga 1.5 kilometros sa Murcia Feeder 4 gikan sa GC&C Proper padulong sa Malipayon.
Ipatuman ang power interruption halin alas 6:00 sang aga tubtob alas 3:00 sang hapon kag ini magapektuhan sa Murcia Feeder 4 nga ginalakipan sang portion sang Brgy. Atipuluan, Bago City.
