Aprubahan pa sang presidente ang concrete plan para sa 2020-2021 school calendar nga ginpasa ni Education Secretary Eleonor Briones sa National Inter-Agency Task Force (AITF).
Sa interview sang Bombo Radyo kay Ian Arnold Arnaez, PIO sang DepEd Division of Negros Occidental, ginpahayag sini nga apisar nga naaprubahan na sang AITF ang concrete plan para sa School Year 2020-2021 may yara sa gihapon nga final say ang pangulo angot diri bangud madamo man ini sang mga rekomendasyon.
Mahimo man nga magbukas sang klase ang private schools samtang nagapaidalom sa General Community Quarantine (GCQ) ang probinsya kag syudad apang indi mahimo nga magpatigayon sang face to face nga pagtudlo bangud may yara ini sang option nga magbukas sang mas temprano ukon magsunod sa school calendar nga ipatuman sa public schools.
Ginpahayag man sini nga may yara na sila sang mga pamaagi sa pagtudlo nga ginhitso para sa School Year 2020-2021.
Ginpahayag man sini nga indi mahimo nga magbalik sa kinaandan bangud may yara na kita sang new normal nga sitwasyon sa pagbukas sang klase sa SY 2020-2021.
Suno kay Arnaez, nakadepende sang health condition sang lugar ang style sang pagtudlo nga ipatuman.
Ginpahayag man sini nga isa sa mga pamaagi sang pagtudlo nga himuon sa pagbukas sang klase ang per semester kaangay sang ginapatuman sa kolehiyo magluwas sa kindergarten.
Apat ka subject ang tun-an sa sulod sang apat ka bulan agud malikawan man ang information overload sa mga estudyante kag bangud man nga indi mahimo mabuhinan ang subject sang mga ini.
Hugot man nga igapatuman ang social distancing gani katunga lamang sang nakaandan nga numero sang mga bumulutho ang tugutan nga makasulod sa tagsa ka eskwelahan.
Indi man mahimo nga paligaran sang isa katuig antes makabalik eskwela ang mga estudyante bangud dako ang posibilidad nga malimtan na sang mga ini ang gintun-an sang nakaligad nga School Year.
Ginpahayag man sini nga dapat padayunon ang pagtuman sang precautionary measures agud mangin habit na ini kag malikawan ta ang matapikan sang balatian.
Ginatugyan naman sini sa mga ginikanan ang decisyon sa pagpabalik sa mga kabataan sa pag-eskwela.
May patigayunon man nga validation sa mga nauna na nga nakaparehistro sa eskwelahan agud makapapat-od kun magpadayun ang mga estudyante sa pag-eskwela.
