Pabor ang school principal sang Bacolod City National High School sa realignment sang confidential fund sang Office of the Vice President ini matapos nga ginkakas sang Kamara.
Nahibaluan nga ginkakas sang House of Representatives ang P1.23 billion nga balor sang confidential funds sang lima ka ahensya nga ginalakipan sang Office of the Vice President (OVP) kag sang Department of Education (DepEd), sa idalom sang proposed P5.768-trillion budget for 2024.
Sa interview sang Bombo Radyo Bacolod kay Richard Gelangre, pabor ini nga irealign ang ginkakas nga confidential fund gikan sa opisina sang bise presidente kag sang Department of Education (DepEd) kag idugang nalang sa pondo sang Department of Education.
Suno kay Gelangre, dako na mabulig sang nasambit nga confidential fund sa DepEd ilabi nga may yara sang 2 million ka mga estudyante sa basic education ang wala na nakapaenrol liwat bangud sa kapigaduhon.
Ginkumpirmar man sang Philippine Statistics Authority nga nagnubo ang enrolment bangud sa kapigaduhon.
Suno kay Gelangre, ginpakamaayo sini nga naghimo sang tikang si Congressman Martin Romualdez agud nga mabuligan ang mga Pilipino.
Ginalantaw man ni Gelangre nga mangin malapuyot na ang dalagan sang politika bangud sa nakita sang kadam-an indi na maayo ang pagtamdanay nanday Romualdez kag Vice President Sara Duterte.
Ginpahayag man sini nga ang natabo nga insidente sa Bajo Masinloc kun sa diin tatlo ka mga tawo ang napatay matapos nga ginsagairan sang foreign vessel ang sakayan sang mga ini.
Nagapangabay man ini nga dapat nga madayon ang realignment sang intelligence fund kag indi pag-ibalik matapos kakason sa nasambit nga opisina.
Samtang, ginpahayag man sini nga ang confidential fund ukon ang intelligence fund tuman kadako nga source sang corruption.
Ginkatingala man sini nga masobra sa 30 ka mga ahensya sang gobyerno ang may yara sang confidential fund.
Suno diri, ang dapat nga mahatagan sang confidential intelligence fund ang Philippine National Police, Philippine Army, National Intelligence Coordinating Agency kag National Bureau Investigation kag indi ang mga ahensya nga wala sang kahilabtanan sa intelligence ang trabaho sang mga ini.
