Tatlo ka indibidwal ang kumpirmado nga ginbawian sang kabuhi samtang walo naman ang pilason matapos ang insidente sang pagpangluthang sa Banga National High School sa Barangay Benitez, Banga, South Cotabato, pasado ala-1:00 sang hapon, kahapon, Setyembre 18.
Antes ang kumpirmasyon sang Philippine National Police (PNP) nahanungod sa numero sang casualties, una nga nagpagwa ang Department of Social Welfare and Development (DSWD) sang initial report nga anum ang patay kag 17 ang nasamaran apang gin-revise ini sa tatlo ka patay lakip na ang suspek kag walo ka pilason.
Santo sa Philippine National Police (PNP), gilayon nila nga ginrespondehan ang insidente kag ginsiguro ang lugar sa pagpakig-angot sa mga opisyal sang buluthuan kag medical responders.
Padayon naman nga ginaberipika sang mga otoridad ang detalye kag motibo sa pagpangluthang.
Ginpahayag sang PNP nga padayon ang imbestigasyon sang Police Regional Office 12 kag South Cotabato Police Provincial Office agud matumod ang kabug-usan nga hitabo.
Nagpanawagan naman ang kapulisan sa publiko nga indi magpalapta sang mga indi beripikado nga report, mga litrato, kag video tuhoy sa insidente.
Nagpasalig ang mga otoridad nga magpagwa sang dugang nga impormasyon kun makumpirmar na ang mga detalye, samtang nagapabilin nga prayoridad ang seguridad sang mga estudyante kag mga personnel sang eskwelahan.
