Ginpasiguro sang Benitez administration nga indi na maulihi ang paghatag sang school supplies sa public elementary school students sa ciudad antes ang full-blown nga face-to-face classes sa bulan sang Nobyembre.
Santo sa ordinansa, manghatag ang city government sang school supplies sa tagsa nga magbukas ang school year.
Suno kay Bacolod City Councilor Al Victor Espino, chairman sang committee on education sa Sangguniang Panlungsod, on track ang city government sa pagbakal sang school supplies.
Nagpromisa naman si Mayor Alfredo Benitez nga on time ang paghatag sang school supplies nga ginpainan sang P15 million nga pondo.
Sa karon, ginadeterminar ang numero sang enrollees sa Bacolod kag kun pila ang baklon nga school supplies.
Ang pondo para diri ang mahimo nga pagakuhaon sa Special Education Fund kag general fund.
Aminado si Espino nga indi pa matagtag ang school supplies sa pagbukas sang klase sa Agusto 22 kun sa diin blended ang format ang klase.
Ang actual nga face-to-face classes naman ang suguran sa Nobyembre 2.
Suno kay Espino, nagatinguha sila nga madeliver ang school supplies antes ang pagsugod sang face-to-face classes sa Nobyembre.
Suno sa committee on education chairman, ginakabig nga urgent ang ini nga bagay gani ginatinguhaan nila nga on time ang distribution.
