Ginatinguhaan nga mapanghatag sini nga Disyembre ang mga school supplies nga ginbakal sang Bacolod City Government para sa public elementary students sa siyudad.
Sa interview sang Bombo Radyo kay Executive Assistant to the Mayor Moises Dela Cruz, ginpahayag sini nga ginatinguhaan nila nga mapanghatag ang mga school supplies sa public elementary students sa siyudad antes magpaskwa apang kun indi mahingagaw, nagpasalig ini nga sa Enero sa masunod nga tuig ini matigayon.
Suno kay Dela Cruz, 522,000 tanan ka mga school supplies ang ila nga ipanghatag kag ginalakipan ini sang walo ka notebook, ballpen, ruler kag lapis kada bata.
Suno sa iya, wala pa mahuman ang mga notebooks bangud gina-ubrahan pa ini sang customized print sang Bacolod City Government, mga emergency number sa Bacolod kag mga precautions kun may kalamidad agud nga mangin mapuslanon sa mga estudyante.
Nagpasalig man ini nga Enero sa masunod nga tuig masugod na ang proseso sang purchase request para sa mga school supplies nga ipanghatag sa June 2020 agud nga indi na masulit ang delay nga natabo sini nga tuig.
