Gin-athag sang isa ka Science Research Specialist sang Philippine Institute of Volcanology and Seismology – Kanlaon Observatory nga wala sang kamatuoran ang nagalapta nga balita sa social media nga naglupok ang Mt. Kanlaon sa probinsiya sang Negros Occidental.
Sa interview sang Bombo Radyo Bacolod kay Mr. Ben Tanatan, Special Research Specialist II, ginkumpirmar sini nga “fake news” ang nagalapta nga mga balita nga naglupok ang Bulkang Kanlaon.
Suno diri, ang mga litrato karon nga nagalapta sa Facebook ang natabo sadtong 2015 kun sa diin narekord ang pinakaulihi nga paglupok sang nasambit nga bulkan.
Suno pa kay Tanatan, natumod na nila nga taga-Bacolod kag taga-La Castellana ang duha ka mga persona nga nagapalapta sang fake news.
Dugang pa sini, mahimo nga mapasakaan sang kaso ang duha ka mga persona nga nagpalapta social media nga naglupok ang bulkan.
Gin-athag man ni Tanatan nga normal ang status karon sang Mt. Kanlaon kag yara sa gihapon sa idalom sang Alert Level 0 humalin pa sang Oktubre 25 sang nagligad nga tuig.
Dugang pa sini, may yara sang sila sang mga seismic sensor nga napahamtang sa mga lugar nga yara sa palibot sang bulkan kun sa diin mahibaluan ang kada hulag sini.
Nagpasalig man siya nga kun may yara sang abnormalities sa Mt. Kanlaon, gilayon nila nga pahibaluon ang publiko.
