Handa na ang mga classrooms sa Graciano Lopez Jaena Elementary School nga amo ang quarantine facility para sa mga seafarers nga magaabot sa Bacolod karon sa gab-i matapos nga mastranded sa Metro Manila bangud sa enhanced community quarantine kaangot sa coronavirus disease.
Kahapon, nagsapol ang Action Team on Returning OFWs (ATRO) agud preparahan ang pag-abot sang mga seafarers nga sakay sa trip nga gin-arrange sang Maritime Industry Authority.
Sa interview sang Bombo Radyo Bacolod kay City Councilor Renecito Novero, chairman sang quarantine centers action team, gindiskusyonan sini kaupod ang iban pa nga committee heads ang approach sa mga maabot nga OFW kag indi OFW nga nastranded sa Manila.
Suno kay Novero, magalabay sa mandatory quarantine procedures ang OFWs bangud indi makapanaog ang indi magkomporme.
Ginpasalig man sini nga yara ang Coast Guard nga magabantay sang pag-abot sang OFWs nga magadiretso sakay sa bus sang city government kag sang PCG.
Sa pagtsekyar sang Bombo Radyo sa GLJES, 18 ka mga classrooms ang ginpreparar diri kun sa diin apat ka occupants kag ibutang sa kada hulot-klasehan.
May yara man sang kaugalingon nga comfort room sa sulod sang classroom kag ginbutangan man sang screen ang bintana.
Nag-abot naman diri ang 60 ka folding beds kag 60 ka hygiene kits.
Alas-4:00 subong nga hapon ang estimated time of arrival sang mga OFWs sa BREDCO port apang napaisol ini alas-7:00 karon sa gab-i.
Suno kay City Councilor Israel Salangga, chairman sang Action Team on Returning OFWs, indi tanan nga 58 ka seafarers ang nakaupod sa trip bangud may yara sang wala naka-comply sa requirements.
Sa pinakaulihi nga report nga nabaton sini, 27 lang ang mga Bacoleño nga nakaupod sa MARINA trip.
