Plano sang Department of the Interior and Local Government (DILG) nga kada tatlo ka tuig na lamang ipatigayon ang Seal of Good Local Governance (SGLG) awarding.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, ginpahayag ni DILG Secretary Jonvic Remulla Jr. ang plano sa awarding ceremony.
Nahibaluan nga kalakip ang probinsya sang Negros Occidental kag pila ka mga banwa kag ciudad sa probinsya sa nakapasar kag nangin awardee sa subong nga tuig nga SGLG.
8-times SGLG awardee naman ang San Carlos City Government.
Kalakip diri ang padya nga P5 million nga balor sang project para sa provincial level.
Suno diri, ginaplano nga himuon na lamang sa tagsa tatlo ka tuig, ukon kadungan man sa pagtapos sang termino sang opisyal.
Nahibaluan nga ang SGLG man ang ginagamit nga basihan sa paghatag sang Performance-based Bonus, apang wala pa matumod kun himuon man nga every three years ang PBB.
Panubuan man ang criteria nga lakipan na lamang sang financial, peace and order, kag innovation.
Suno kay Lacson, wala sang problema sa probinsya kun may SGLG award ukon wala bangod sila ang nagatrabaho indi para sa award kundi agud magserbisyo sa mga Negrense.
Pasalig sini nga sila nga mga government employees ang magapadayun lamang sa ila pagserbisyo.
Kun madayun ang plano, ang masunod nga SGLG awarding ang mahimo patigayunon na lamang sa 2028.
