JAPAN – Ginkompirmar ni Bombo Correspondent Josel Palma direkta sa pungsod Japan nga ginsuspende anay sang mga otoridad ang pagpangita sa mga crew sang live export vessel nga nadula sa southwest nga bahin sang Japan bangud sa malain nga panahon.
Suno kay Palma, ang target sang Bagyo Haishen amo ang Amami Oshima Island kag Minami Daitu, isa man ka isla nga sakop sang Okinawa kasubong man ang Korean Peninsula nga ginwaswasan man sang Bagyo Maysak.
Bangud sini, gin-untat ang search and rescue operations sa mga crew sang Gulf Livestock 1 nga madumduman nga naglugdang sang tinalikdan nga Miyerkules sang kaagahon.
Suno kay Palma, ginpahayag ni Junti Sakaguchi, ang in-charge sang search and rescue operations nga sang Biyernes antes pa man temporaryo nga gin-untat ang operasyon bangud sa nagahilapit nga paglaslas sang bagyo, nagpasalig man ini nga maresume man ang rescue operations depende sa weather condition.
Sa pihak nga bahin, wala naman nagbiyahe ang bullet trains kag ginsuspende naman ang mga flights sang Nippon Airways (ANA) bangud sa bagyo.
Nagpatawag naman sang paghinun-anon ang prime minister agud mahambalan ang mga tikang nga pagahimuon bangud sa bagyo.
