Padayon ang operasyon sang mga rescue teams sa ikatatlo nga adlaw, para sa mga survivor nga posible na-trap sa idalom sang mga narumpag nga establisyemento, matapos gin-igo ang Colombia sang magnitude 7.4 nga linog sang Lunes.
Nagdangat na sa kapin 250 ka mga indibidwal ang napatay.
Isa naman ka natiphag nga apartment complex sa ciudad sang Cali ang wala untat nga ginapatigayunan sang search and rescue sang emergency workers sa pagpangita sa anuman nga senyales sang kabuhi sa sulod.
Suno kay Camilo Cano, isa ka fire department official sa Bogota, 20 ka indibidwal na ang naluwas sa apartment complex sa una nga 12 ka oras matapos ang linog sa bulig sang local rescue crews kag mga residente.
Tatlo pa ka survivor ang nagdugang matapos ang mas mabudlay nga rescue operations sa idalom sang mag debris.
Padayon man nga nagalaum kag nagahulat sang balita ang mga pamilya sang mga na-record nga missing kaangay sang isa ka amay sa diin na-trap ang iya 11-anyos nga bata nga babayi kaupod ang lolo kag lola sini.
