Nagpatigayon sang aerial surveillance ang Philippine Coast Guard sa ginlugdangan sang FV St. Peter the Fisherman II sa tunga sang Sicogon Island sa Carles, Iloilo kag ciudad sang Cadiz, sa tinutuyo nga makita ang mga nabilin pa nga missing nga crew sang fishing vessel.
Suno kay Chief Petty Officer Wilmar Dolorfino, commander sang Coast Guard Sub-Station Cadiz, nag-umpisa ang pagpatigayon nila sang aerial surveillance alas-9:00 sang aga.
Sa pagpatigayon sang operasyon, nakita naman sang mga ini ang sister boat sang barko kasubong man ang naglutaw nga pukot.
Paathag ni Dolorfino nga tubtob maayo ang ila visibility magapadayun man sila sa search and rescue operation.
Yara naman diri ang District Commodor kag duha ka mga piloto.
Samtang ginabanta naman nga subong nga adlaw may patigayunon naman nga jump off ang mga divers sang Philippine Coast Guard (PCG) kag sang City Disaster Risk Reduction Management Office (DRRMO) sang Cadiz alas-7:00 sang aga.
Suno kay Negros Occidental Board Member Jongben Mirhan, magahingyo ang mga ini sang assitance gikan sa fishing boat operator nga amo ang pagasayan sang pila ka mga divers kag magadala sang iban nga mga diving gears.
Samtang wala naman ginadumili sa mga manugpanagat ang magpangisda bangod maayo ang tiyempo, apang pahanumdom ni Mirhan nga magpalayo lang sa lugar kun sa diin naglugdang ang barko.
Nagapati ang Board Member nga nakahangop ang mga manugpanagat kag nagakabalaka man ang mga ini sa nagapabilin nga missing nga mga crew sang fishing vessel.
Samtang ginpakigbahin man sang Board Member nga kapin alas-11:00 kagab-i, nakarecover naman ang PCG sang duha ka mga bangkay sa ila nga nagapdayun nga search and rescue operation.
