Nag-untat na sa pagpatigayon sang search and retrieval operation ang Canlaon City Police Station kag sa karun nagafocus na sa rehabilitation efforts.
Sa interview sang Bombo Radyo Bacolod kay Police Lt Col. Marlon Mallorca, officer in charge sa Canlaon City Police Station, 20 na ang mga narecover nga bangkay samtang apat nalang ang nabilin nga missing walo ka adlaw makaligad sang pagwaswas sang Bagyo TINO.
Suno diri, ang kapulisan ang nakigbahin sa joint search and retrieval operation upod sa Philippine Coast Guard, Bureau of Fire Protection, Philippine Army, kag Local Disaster Risk Reduction and Management Office.
Bangod pila ka adlaw na ang nagligad, nag-untat na ang kapulisan sa operasyon sa baylo, sila ang nag-augment naman sa rehabilitation efforts.
Ang mga kapulisan ang naga-upod sa clearing operations kag naga-alalay man sa mga heavy equipments.
Suno diri, naclear na ang mga dalanon nga napuno sang mga dalagkuan nga mga bato matapos ang nagluntad nga flashfloods kag rockslide.
Apang may mga taytay pa nga kinahanglan sang repairs.
Suno kay Mallorca, malabayan na ang mga taytay apang para sa mga light vehicles pa lamang.
Panawagan naman sini sa mga pumuluyo nga gilayon nga magreport sa kapulisan ukon sa Barangay kun may-ara sang masapwan nga bangkay agud marecord kag matsekyar sa mga pamilya nga may namissing nga himata.
