Ginahulat pa ang pag-abot sang search warrant agud masulod ang balay kun sa diin naggwa si Punong Brgy Arnie Benedicto nga isa sa suspek sa pagpangluthang nga nagluntad sa Brgy Mambulac, Silay City, Negros Occidental, kaina sang aga.
Kaina, nakit-an si Benedicto nga nagsulod sa balay nga isa ka private property nga gina-usar sang mga kandidato kag supporters sang Team Asenso.
Paggwa sini, hinali lang niya nga ginpaarakan sang luthang ang mga tawo sa gwa sang balay nga amo ang volunteers sang Team Ugyon nga nagamonitor sa gina-alegar nga vote buying.
Duha ang kumpirmado nga patay nga ginkilala nga sanday Albert Salimbot, yara sa legal nga edad, residente sang Hda. Macamig Pulo, Brgy E. Lopez kag Ronnie Piedad, 45 anyos, residente sang Zone 7, Purok Ipil-Ipil, Brgy Mambulac samtang ang mga pilason naman ang ginkilala nga sanday Ruel Espinosa, 42, anyos, Purok Highway, Zone 15, Talisay City; Ric Ortillano, 46 anyos, residente sang Hofileña Subd, Brgy Mambulac; Wilfredo Cuello, 46 anyos, residente sang PLDT Baybay, Brgy Mambulac; Jason Belleza, legal ang edad, residente ang Yolanda Housing, Brgy E. Lopez; Joey Pomares, residente sang Brgy Mambulac; Glenn Gutierrez, 49 anyos, residente sang Cabay Bodegam Brgy Guinhalaran, kag may isa pa nga wala nakuhaan sang identity.
Sa karun, at large si Benedicto samtang gina-alegar nga indi magnubo sa tatlo ang yara sa gihapon sa sulod kag ginahulat na lang ang pag-abot sang search warrant agud masulod ang balay.
