Ginpasalig sang event director nga preparado na ang venue sa Arena Dance Competition bisan pa mag-ulan.
Sa interview sang Bombo Radyo Bacolod kay Nestor Guillaran, event director sa Street Dance and Arena Competition, naset-up na nila ang stage kag mga benches para sa Arena Dance Competition.
Suno diri, ginmonitor gid nila ang sitwasyon sa lugar sang magbaha, kag nakita nila nga sang maghulaw ang ulan gilayon man nga nagsubside ang tubig.
Nahibaluan nga ang pagbubo sang ulan nga nagresulta sa pagbaha sa lugar nga sakop sang reclamation area, ang nadungan pa sa high tide ukon taob.
Pasalig niya nga ginpangamanan na sang Bacolod Gugma Foundation, upod sa Bacolod City Government, kag SM Corporation ang kaangay nga posibilidad.
Sa pihak nga bahin, aminado man ini nga mas magamay ang venue kun ipaanggid sa nakaandan nga Paglaom Sports Complex nga mas may malapad nga area kag pwesto para sa mga venue.
Ang ila nga naplastar nga benches sa subong nga Arena Competition ang makacater lamang sa dos mil ka tumalan-aw, gani mangin first-come first-serve ang ila systema.
Indi man pwede nga magreserve sang pulungkuan, samtang ang makapwesto ang indi naman pwede maggwa.
Suno kay Guillaran, may-ara sang frisking area sa parehas nga SM north kag south wing.
