Luwas sa mga kapulisan sang Bacolod City Police Office kag Negros Occidental Police Office nga nakapatigayon na sang send-off ceremony kahapon, kag nadeploy na sa nanarisari nga area, may mga adisyunal nga augmentation pa nga lauman gikan sa PRO 6.
Sa interview sang Bombo Radyo Bacolod kay BCPO Director Police Col. Eugene Rebadomia, indi kaangay sadto nga tatlo ka adlaw lamang ang request sa augmentation sang personnel, subong nga Masskara ini ang ginpalawig halin Oktubre 7 tubtob 18.
Ini man ang rasun sa pagplastar nila sang beliting quarter.
Ini agud indi na mabudlayan sa pagbyahe ang mga kapulisan nga ideploy nga malayo pa ang ginapulian, partikular na ang mga ideploy gikan sa iban nga probinsya.
Ginapakamaayo na lamang sini nga kalabanan sa mga pulis ang Bacolodnon.
Lakip sa mga billeting area ang nahamtang sa Arao Relocation Site sa Brgy Vista Alegre, sa Brgy Felisa, kag Education and Training Center School (ETCS).
Sa kaangot nga balita, ginpaathag man ni Rebadomia nga indi sa whole duration sang kapiestahan ideploy ang tanan nga personnel.
Sa baylo, sila ang magadeploy sa mga lugar nga may aktibidad, kaangay lamang subong nga una nga inadlaw sang Oktubre, kun sa diin kadam-an sang mga pulis ang ideploy sa mga kalan-an.
Magabutang gihapon sang entrance kag exit, kag frisking area para sa pagsulod sa mga festival sites.
Samtang ginadumilian gihapon ang pagdala sang backpack, kag mga deadly weapons sa festival sites.
Pahanumdom man niya sa kapulisan nga ginadumulian ang mag-inom, ipabilin ang maximum tolerance, kag seguruhon ang proper grooming.
May simulation exercise man ukon communication exercise nga patigayunon agud matest ang kapasidad sang mga law enforcement agencies sa mga emerhensya.
May-ara man sila sang public enformation officer nga assigned kada adlaw kun sa diin mareport tanan nga PNP personnel, Bureau of Fire Protection, City Disaster Risk Reduction and Management Office, kag iban pa.
Yara man sa record sini kun sin-o ang mga nakadeploy sa kada lugar kag ang oras sang ila nga schedule, agud may monitoring kun sin-o ang mga responsible.
