Ginpasalamatan sang Secretary General sa Alliance of Concerned Teachers (ACT) – Negros Occidental nga nabatun na sang tanan nga mga manunudlo nga nagserbe sa Barangay and Sangguniang Kabataan Elections 2023 sa ciudad sang Bacolod, apang nagpabutyag man ang mga ini sang pila ka mga concerns
Sa interview sang Bombo Radyo Bacolod kay ACT – Negros Occidental Secretary General Grace Abellar, gin-athag sini nga matapos ang long weekend kasunod sang tigkalalag sang Nobyembre 6, nagsugod naman ang pagrelease sang Commission on Elections (Comelec) sang honoraria sang tanan nga mga manunudlo nga nagserbe sa eleksyon gikan sa 61 ka mga Barangay sa ciudad sang Bacolod.
Ginpasalamatan man sini ang Comelec bangod nangin matuod sila sa ginpromisa sa orientation nga gilayon nga ihatag ang honoraria.
Apang aminado ini nga madamo sang mga nagakumod nga mga manunudlo.
Ini bangod sa tuman ka dako nga taripa nga ginabuhin gikan sa ila nga honoraria.
Suno kay Abellar, ang Master Teachers ang ginabuhinan sang 20 porsyento nga tax samtang 15 porsyento naman ang ginabuhin gikan sa mga Teacher 1.
Kwestyon sang mga Master Teacher kun ngaa may kinalain sa ginabuhin nga tax apisar nga ang ila ginpirmahan sa Bureau of Internal Revenue (BIR) ang parehas man nga 15 porsyento.
Suno diri sadto sang manubo pa ang honoraria, halos tres porsyento lamang ang tax nga ginakolekta apang sa pagdako sang honoraria tuman man ang pagdako sang tax collection.
Pahayag pa ni Abellar nga ang ACT Partylist sa pagpanguna ni Representative France Castro ang nagduso na sang hagna nga nagahatag tax exemption sa mga manunudlo nga nagaserbe sa eleksyon kag dapat ang taripa ang ginadagdag lamang sa basic income may kaangtanan sa profession.
Panindugan sini nga ang pagserbe sa eleksyon ang indi kabahin sa ila function kag makabig lamang nga voluntary gani dapat ini ang exempted sa tax.
Ang hagna ang napasar na kuntani sa Kamara kag Senado apang sang Hulyo 20, 2022, ini ang ginveto ni President Ferdinand “Bongbong” Marcos Jr., nga tuman nga ginkasubo sang mga manunudlo,
Magluwas sa tax exemption, ginapanawagan man sang mga manunudlo ang overtime pay kag dugang nga transportation allowance.
