Ginkwestyon sang Secretary General sang General Alliance of Workers Association (GAWA) ang Senate Bill 1778, nga nagatuyo nga maglegalize kag maregulate ang commercial importation sang second-hand clothes kag mga goods kaangay sang mga bag kag sapatos ukon ukay-ukay.
Sa interview sang Bombo Radyo kay Wennie Sancho, Secretary General sang GAWA, ginpahayag sini nga isa ang pagbaligya sang ukay-ukay sa pamaagi sang pila ka indibidwal agud makahatag sang masustinir sa ila nga mga pamilya, labi na sa karun nga tuman ang kapigaduhon.
Suno diri, ang pantandog sa means of living sang isa ka indibidwal ang makabig nga isa ka diskriminasyon nga nagapakita nga ang mga ini ang “anti poor” kag “anti labor” para sa mga manugbaligya.
Panugyan sini nga dapat usisaon kun paano nga ang mga used clothes naggikan sa abroad, nga makabig donasyon ang ginabaligya kun mag-abot diri sa Pilipinas.
Kasubong man nga ginkwestyon sini kun ngaa ginafocusan sang legislators ang amo nga hagna imbes nga pasanyogon sang mga ini ang opportunidad sa trabaho kag palangabuhian kasubong man ang pagpanubo sa bili sang mga balaklon kag masolusyunan ang inflation.
Ginakatingala man sini kun ngaa si Senator Raffy Tulfo nga kilala bilang taga depensa sang pigado, ang nagahilabot sa means of livelihood sang pigado kag mga mamumugon nga nagabaligya sang ukay-ukay, gani luyag ni Sancho nga mahibaluan ang rason sang senador.
