Gin-athag sang secretary to the mayor sang ciudad sang Bacolod nga wala sang lamud-pamulitika ang pagdesignar kay Bacolod City Administrator Atty. Pacifico Maghari bilang concurrent manager sang Public Employment Services Office (PESO) kundi pagtuman sang department order sang Department of Labor and Employment (DOLE).
Sa interview sang Bombo Radyo Bacolod kay Atty. Karol Joseph Chiu, ang designation ni Atty. Pacifico Maghari bilang PESO manager ang kabahin sang formal compliance sa layi.
Suno kay Chiu, kinahanglan nga maplastar ang organizational chart sang ciudad bangud naqualify ang mga ini sa national assessment para sa Seal of Good Local Governance (SGLG).
Suno diri, ginbutang si Maghari bilang PESO manager bangud ang nasambit nga position ang nagakinganlan nga ang magapungko dapat ang yara sa department level ukon mataas sa salary grade 24.
Suno sa secretary to the mayor, ang anay manager sang PESO nga si Jovelyn Canoy ang yara sa Executive Assistant II ukon salary grade 17 gani indi maqualify sa nasambit nga position.
Ginpahayag man sini nga magapabilin sa PESO si Canoy kag magabulig kay Maghari.
Magapabilin man nga city administrator sang ciudad si Maghari.
Apang ginalantaw ni Chiu nga mangin permanent position ang pagdesignate kay Maghari.
Aminado man ang secretary to the Mayor sang ciudad nga wala pa ini makahibalo sang masunod nga matabo apang ginalantaw na sini nga magapangita man ang ciudad sang magapungko nga city administrator.
Liwat man sini gin-athag nga nagapabilin nga maayo ang relasyon ni Bacolod City Mayor Alfredo “Albee” Benitez kag ni Bacolod City Lone District Congressman Greg Gasataya.
Nahibaluan nga ang designation ni Maghari bilang PESO manager sang ciudad sang Bacolod ang kasunod sang ginpagwa nga memorandum sa idalom sang Department Order No 157-16 sang Department of Labor and Employment kag Implementing Rules and Regulations sang Republic Act 8579.
