Nagpatigayon ang Regional Civil Security Unit 6 (RCSU6) sang imbestigasyon angot sa deployment sang security agency sa Hacienda San Antonio Dos, Barangay Dos Hermanas, Talisay City, Negros Occidental.
Ini kasunod sang pagpanaya kag pagpalupok sang isa ka gwardiya sa mga pumuluyo nga mga CARP beneficiaries.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, nagpatigayon sang imbestigasyon ang RCSU-6 sa deployment sang security agency sa lugar.
Suno kay Jocson, ginahulat pa sang mga ini ang resulta sang imbestigasyon sang RCSU 6 agud nga mahibaluan kun may yara sang salabton ang ahensya sa natabo nga insidente.
Ang security guards ang exempted sa COMELEC Gun ban kun yara ang mga ini sa area of operations kag nagasuksok sang uniform.
Una na nga ginpahayag nga ginhitso na sang Talisay City Police Station ang kaso batok kay Jose Aluntaga Jr, Alyas Jojo ukon Alyas Cesar Castro, 68 anyos, ang gwardya nga nanaya kag nagpalupok sang armas sa nasambit nga lugar.
Ang konflikto ang nag-umpisa sa duta nga gina-agawan sang mga Comprehensive Agrarian Reform Program (CARP) Beneficiaries kag nagapakilala nga tag-iya sang propedad nga si Paul Chang.
Tatlo ka kaso ang ginpasaka batok kay Aluntaga nga amo ang grave threat, illegal discharge of firearms kag Republic Act (RA) 10591 ukon Comprehensive Firearms and Ammunition Regulation Act.
