Ginpahayag sang station commander sang Bacolod Police Station 6 nga may yara sang pamahog nga nabaton ang biktima antes pa man natabo ang pagtiro-patay sa iya kagab-i.
Madumduman nga patay ang isa ka security guard matapos ginluthang sang wala pa makilal-an nga mga persona sa Purok Paho, Barangay Taculing, Bacolod City, kagab-i.
Ginkilala ang biktima kay Jose Rey Jaranilla, 51-anyos, isa ka security guard kag nagaduty sa Bredco area.
Nakaangkon sang pilas tuga sang pagpangluthang sa nagkalain-lain nga bahin sang iya lawas si Jaranilla kag ginhingagaw pa dala sa ospital apang wala na ini natabangan.
Narecover sa crime scene ang indi magnubo lima ka mga empty shells sang ginahibalo pa sa karun nga sahi sang armas luthang.
Sa interview sang Bombo Radyo kay Police Captain Dax Santillan, may ginpahayag ang asawa sang biktima sang ini ang naestorya nila personal nga may pamahog nga nabaton ang biktima apang wala gid masaysay sang bana sini kun ano ang pamahog nga nabaton.
Suno kay Santillan, ang background sang biktima amo ang isa ka security guard sa Bredco kag isa man sadto ka reserve sang airforce.
Wala man sang nakita nga involvement sa illegal nga druga ang biktima.
Wala pa man ka desisyon ang asawa kun ipaidalom sa autopsy ang bangkay biktima.
Work related nga motibo ang ginatutukan sa imbestigasyon sang mga kapulisan sa pagpatay sa biktima.
