Patay ang isa ka security guard samtang duha ka iban pa ang nasamaran kasunod sang nagluntad nga karambola sang mga motorsiklo sa National Highway sa Purok Margarita, Barangay Abuanan, Bago City, Negros Occidental kahapon sang kaagahon, Hunyo 19.
Ginkilala ang napatay nga si Jason Dulce, 35 anyo, security guard, residente sang Purok Ma. Elena, Barangay Dulao, Bago City kag nagamaneho sang motorsiklo nga Rusi Flash 150CC nga pula.
Imbulbado sa aksidente ang pula nga Rusi TC 125 CC motorcycle, wala sang plaka nga ginamaneho ni Alyas Joseph kasado, residente sang Purok Ma. Elena ,Brgy. Dulao, Bago City; Black Rusi Sprinter 150CC motorcycle, wala sang plaka kag ginamaneho ni Jason Indo, legal age, single kag residente sang Brgy Sum Ag, Bacolod City kag ang motorsiklo nga ginamaneho sang napatay.
Sa interview sang Bombo Radyo Bacolod kay Police Chief Master Sergeant Jeffrey Montinola, traffic investigator on case sang Bago City Police Station, natabo ang pagkarambola sang motorsiklo alas 2:15 sang kaagahon kun sa diin ang tatlo ang halin sa Barangay Tabunan bangud may bayle bangud nagasaulog sang Barangay Day.
Suno kay Montinola, sa alegasyon sang amay sang biktima may yara ang mga ini sang gindul-ong sa Barangay Abuanan.
Ginpahayag man sang mga naka-witness nga madasig ang pagpadalagan sang tatlo tubtob sa ila nga pagbalik.
Pag-abot sa lugar sang aksidente nagkarambola ang tatlo ka motorsiklo.
Bangud sa impact si Dulce ang napatay samtang si Joseph kag Jason ang padayon pa nga gina-obserbahan sa ospital matapos nga makaangkon sang samad.
Wala pa matumod ang rason sang pagkarambola apang ginalantaw nga nagsangitay ang mga ginamaneho nga motorsiklo bangud sa madasig nga pagpalagan sang mga ini.
