Patay ang isa ka security guard matapos nga ginluthang alas-10:45 kagab-i sa 23rd Street, Barangay 5, Bacolod City.
Ang biktima ang ginkilala nga si Security Guard Jofen Dequito, 42 anyos kag residente sa Hacienda Bernabe 2, Barangay Salvacion sa banwa sang Murcia kag empleyado sang iWatch agency.
Pahayag sang masami sini nga kaupod sa pagpanyapon, nga naghingyo nga indi na paghingadlan, nga magkaupod sila sa pagpanyapon kagab-i apang nauna nga natapos si Dequito samtang sila ang nabilin sa kalan-an.
Suno diri, hinali nalang sila nga nakabati sang lupok apang wala na nila ini ginpaligban bangod sa pagpinsar nga ini ang palupok lamang, apang sa ila nga paggwa nasapwan na lamang nila ang security guard nga nagahamyangon kag nagapaligo na sang dugo samtang yara sa kilid sang dalan.
Ang biktima ang nakaangkon sang igo sa ulo.
Madamo naman sang mga pumuluyo sa palibot ang nagapahayag nga mabuot nga persona ang security guard kag masami gid ini nga nagapanapak sa mga nagalabay.
Samtang padayun man ang pagpangita sa armas sang biktima bangod wala na ini sang armas sang nakit-an ang iya nga bangkay.
May mga bystander naman nga nakapahayag nga sila ang nakakita sang naglabay nga motorsiklo.
Samtang may-ara naman sang mga CCTV camera sa lugar nga mahimo makabulig sa imbestigasyon sang mga kapulisan natuhoy sa insidente.
