Nagpagwa man sang iya bahin ang building guard nga gina-alegar ginpahog ni Bacolod City Councilor Al Victor Espino sang armas-luthang sang ini ang nagpadulong sa opisina sang Bacolod Traffic Authority Office sang Miyerkules sang hapon.
Suno kay Abner Salvallon, sang nagapanaog si Councilor Espino sa iya salakyan, indi na madrawing ang iya nawong.
Suno kay Salvallon, ginkuha sini ang atensyon sang konsehal agud nga mahibaluan kun ano ang tinutuyo sini sa opisina sang BTAO kag gintudlo pa si BTAO Head Police Major Junji Liba apang siya ang wala ginsapak.
Liwat sini ginpalapitan ang konsehal apang siya ang ginwakli kag ginhambalan sang indi maayo nga mga tinaga.
Suno diri, ginhambalan siya ni Espino nga “hikapa ko liwat kay tiruhon taka” kag ginpakita ang ginasukbit sini nga armas-luthang.
Suno pa kay Salvallon, nagpabilin man ini nga kalmado kag gintulok man sini si Liba nga nagapungko man sa isa ka lamesa sa nasambit nga opisina sang may nabatian ini nga pamahog nagikan sa konsehal.
Aminado man ini nga natrauma siya sa natabo bangud sa kapin isa ka tuig sini nga pagtrabaho sa opisina sang BTAO, bag-o pa lang siya nakasalapo sang kaangay nga insidente.
Gin-alegar man sini nga ang duha ka mga college student nga babayi ang nagtawag kay Espino bangud ang duha ka mga lalaki nga tag-iya sang motorsiklo nga gin-impound sang BTAO ang wala man nakilala sa konsehal.
