Patay ang isa ka security guard nga nagasakay sa motorsiklo matapos nga nabungguan sang tricycle sa Circumferential Road, Brgy. Alijis, syudad sang Bacolod, pasado alas-5:00 ang takna kaina sang kaagahon.
Ginkilala ang biktima kay Lowie Vergara, 41 anyos, residente sang Barangay Handumanan, Bacolod City kag nagagwardya sa University of Negros Occidental Recoletos.
Si Vergara ang nabungguan sang tricycle nga nag-overtake sa isa ka carry nga nagabiyahe padulong sa norte nga direction.
Bangud sa kakusog sang impact, nagsuhot ang gwardiya sa carry kag ini ang dead on the spot.
Padulong kuntani ang biktima sa trabaho sini sa University of Negros Occidental-Recoletos antes natabo ang aksidente.
Sa interview sang Bombo Radyo Bacolod kay Police Staff Master Sergeant Clark Cañon, traffic investigator sang Bacolod City Police Station 7, nagabiyahe panorte nga direction ang carry nga ginamaneho ni Waren Jay Blance, 42, sang Brgy. Pahanocoy upod ang asawa sini nga si Jenafe Logakit, 28 anyos; sang nag-overtake ang tricycle nga ginamaneho ni John Dayday, 23 anyos, sang banwa sang Cauayan nga magadul-ong kuntani sang tinapay sa Brgy. Cabug.
Base sa video nga kuha sang dashcamsa carry nanday Blance, wala gilayon nakabalik sa iya nga lane si Dayday gani nabungguan sini ang motorsiklo ni Vergara nga nagabiyahe padulong sa south direction.
Base sa makit-an sa video, madasig ang pagpadalagan ni Dayday sang tricycle.
Suno kay Cañon, ginalantaw sini nga mahimo nga nag-alang-alang sa pagbalik sa lane sini ang tricycle.
Sa karun, yara sa paghinakop sang Police Station 7 sanday Blance kag Dayday.
Samtang aminado man si Dayday nga ini ang nag-overtake sa carry.
