Opisyal na nga maga-umpisa ang Negros Island Regional Athletic Associations Meet (NIRAAM) subong nga adlaw, Marso 1, nga patigayunon sa Panaad Park and Stadium gani nagapreparar na ang mga kapulisan ilabi na ang Explosive Ordnance Disposal and Canine Unit (EOD/K9) para sa pagpatuman sang ila security measures sa area.
Sa interview sang Bombo Radyo Bacolod kay Police Capt. Alberto Sardua Jr., team leader sang provincial EOD Canine Unit, pagabutangan sang canine ang mga vital points sang area agud masiguro nga wala sang hazard ukon mga butang nga magadala sang halit sa tawo.
Suno kay Sardua, magapatigayon sila sang paneling operation agud ma tsekyar ang kada area ilabi na ang entrance, ukon ang mga bahin kun diin pagahiwaton ang mga ihitabo, amo man sa mga lugar nga may yara sang gas tank, generator, kag electricity source.
Suno diri, adlaw-adlaw nila ipatuman ang ila mga operasyon tubtob sa pagtakop sang NIRAAM.
Suno kay Sardua, may yara sila sang duha ka K9 kag anum ka EOD technician.
Pahanumdom ni Sardua sa mga delegates kag sa tanan nga magatambong sa mga event, gilayon nga magkoordinar sa ila nga unit kun may makit-an nga indi matumod nga butang nga posible may dala nga katalagman sa kabuhi sang tawo, agud mahatagan sang nagakadapat nga tikang… Samtang….prayoridad sang Department of Risk and Reduction Management (DRRM) Teams kag medical teams ang seguridad sang Negros Island Regional Athletic Association (NIRAA) Meet delegates.
Sa interview sang Bombo Radyo kay Dr. Ramir Uytico, Ceso III, Regional Director sang DepEd NIR, ginasiguro nila ang safety kag ang maayu nga panlawas sang mga atleta bangud suno diri, ano ang gamit sang medalya kun ang mga kabataan ang indi safe kag healthy.
Ginpaathag sini nga ang DRRM teams kag medical teams ang magatutok sa seguridad sa tagsa ka mga atleta.
Nagalaum si Dr. Reso nga mabatian ang mga istorya sang pagbinuligay sang kada isa agud mangin madinalag-on ang patigayunon nga NIRAAM 2026 sa ciudad sang Bacolod nga ginbuksan na subong nga adlaw sang Marso 1.
Nagpasalig naman ini nga ang Regional Office ang padayon nga nagahatag sang suporta kag nagapamati sa mga delegates sa bilog nga probinsya sang Negros Island Region.
