Mas ginhugtan pa ang seguridad sa mga airport kasunod sang bombing sa gym sang Mindanao State University sa Marawi City sang Domingo sang aga kun sa diin apat ang napatay kag 50 ang pilason.
Suno kay Police Major Deejay Domingo, pinuno sang Bacolod Silay Airport Police, nagmandu ang higher command nga mas hugton pa ang pagbantay samtang nagahilapit ang Christmas holidays.
Sa karon suno kay Domingo, madamo na ang mga pasahero nga nagalabay sa airport agud nga magpauli sa ila mga pamilya.
Padayon man ang screening sa sulod kag gwa sang airport agud nga indi malutsan.
Suno diri, kinahanglan nga hugtan ang seguridad bisan wala sang threat agud masiguro ang safety sang mga pasahero.
Nagasunod naman ang mga pasahero sa ginapatuman nga security measures.
Sa karon, ang Airport Police ang may isa ka canine dog nga nagatsekyar sa mga bagahe bangud nagretire na ang isa, apang nagrequest naman ang mga ini nga dugangan sang isa.
