Ginpasalig sang hepe sang Cadiz City Police Station nga plastado na ang ila nga deployment plan para sa seguridad sang Dinagsa Festival kun sa diin ang highlight sini ang patigayunon sa Enero 29.
Sa interview sang Bombo Radyo Bacolod kay Police Lt. Col. Gil John Despi, all set na ang ila nga pagbantay sa nasambit nga festival.
Naghingyo man sila sang augmentation nagikan sa iban nga unit kaangay sang Negros Occidental Provincial Mobile Safety Company, K-9, Coast Guard, kag Maritime Police.
Nagpahanumdom si Despi sa mga magapadulong sa Cadiz nga indi maggamit sang spray kag enamel nga pinta kag anuman nga chemical nga makatuga sang halit sa mata sang iban.
May yara naman sang magalibot mismo agud maglantaw sa gamiton nga pinta nga ini ang latex ukon water-based samtang ginadumilian man ang improvised nga water gun.
May ginbutang naman nga border control ukon checkpoint sa norte kag duha ka iban pa nga entry points sa ciudad agud mausisa ang mga nagasulod.
Nagalaom naman ang hepe nga magacooperate ang tanan nga magaenjoy sang kahiwatan agud nga matapos ini nga malinong kag matawhay.
